مهم ، ملاحظات + وسائل تواصل .

صبحهّم مسهّم بالخير يا رب ..

نزلت كل التدوينات الي كنت كاتبتها برمضان الي فات للسنه التحضيرية،

وأتمنى تنتبهون اذا كان فيه تغير بالنظام او شيء لان التدوينه نزلت على اساس دفعة ١٤٣٦..

وبالنسبه لمستوى ثالث بالاعداد الاعام بكليه ادارة الاعمال ، نزلت كل مادة بتدوينه مختلفه واضفت كل مصادرها

 والاشياء الي بتساعدكم وبتسهل عليكم الدراسة باذن الله .. سوادً كان من اجتهادي او من اجتهاد دفعتي

 اودُفع قبلنا فجميع الحقوق محفوظة لهم .. جزاهم الله خير الجزاء .

وباذن الله بنهاية السنة بينزل مواد الترم الثاني وبكل مصادرها باذن الله .

اذا استفدتوا انشروه بين كل الدفع ، لاني تعبت وانا اذاكر واجمع المصادر كلها 

فعلشان ما يتعبون مثلي :(

ول أي أستفسار أو تواصل عبر :

Twitter @hanellz

Ask.fm @h2neen

Good luck ()

أهم مواقع الجامعة

أهلًا وسهلًا  بالجميع ، يالله حيهّم

اليوم بكتب لكم أهم مواقع جامعة الملك سعود ولانهم الله يصلحهم لهم مليون موقع

بس كل واحد له شغلته فبعرفكم عليهم واحد واحد بإذن الله

أول شي / البوابة الالكترونية (https://edugate.ksu.edu.sa)

ومنها تشوفين جدولكِ + تقدمين أعتذار او تأجيل ، تقدمين طلب على الباصات ، تشوفين مكافأتك و نتائج المقررات وأشياء كثير > هذا يعتبر أهم موقع بالنسبة لطلاب الجامعة كلها.

ثاني شي / موقع تحضيريتي (https://mypy.ksu.edu.sa)

ومنها أعرف موعد أختباراتي ومكانها ، نتائج اختبارات الشهرية ، غياباتك بكل المواد وأهم الاعلانات من الجامعة 

ثالث موقع / موقع جامعة الملك سعود (http://ksu.edu.sa)

هذا ما يفيدك غالبًا كطالبة بس فيه كل الاشياء الي تصير بالجامعة ومهم شوي يعني هههه 

رابع موقع / نظام إدارة التعلم أوما يسمى بالبلاك بورد (https://lms.ksu.edu.sa) 

هذا فيه لكل مادة موقع خاص فيه تحلون الواجبات الالكترونية للريض وتشوفون شرح أ.نضال اذا ما فهمتوا هو يشرح كل الدروس 

وتختبرون نفسكم بالجلسات قبل الاختبار للنهج والصحه والعلم ، وتنزلون مشاركاتكم بالمنتديات لهذي المواد بعد 

وتشوفون الفيديوات حقت الاسعافات الاولية للصحة 

خامس موقع / مدونة  (https://epy.ksu.edu.sa/ELSDOnline/)

هذي المدونة ELSD الي قلنا انها حقت الانقلش الجميله الرهيبه فيها تدريبات لجميع مهارات الانقلش بشكل مرتب 

سادس موقع / ايرا (http://era.py.ksu.edu.sa)

خاص للحاسب بس وفيه ترفعون واجباتكم وتحملون البراكتس وفيه تطبيق على العملي 

ويختلف أن هذا للبنات (http://era.py.ksu.edu.sa/pygirls) 

وهذا للشباب (http://era.py.ksu.edu.sa/pyboys)

سابع موقع / بس خلاص حلا هووو ؟ هههههههههه 

بس والله خلصنا هذي هي مواقع الجامعة ، أتمنى ما نسيت ولا واحد أن شاء الله 

أي استفسار على تويتر أو هنا @hanellz ، أتشرف بالجميع **

مواد الترم الثاني تحضيري علمي ، وكيف نذاكر كل وحده بالضبط؟

مسهّم صبحهّم بالخير يارب تكونون بأفضل صحة وأحسن حال 

بشروني عنكم عساكم بخير ؟ اليوم بكتب لكم مواد الترم الثاني بالتفصيل 

وأيش افضل طريقة مذاكره من وجهه نظري :*

الحساب الآلي واختصارها (تقن 140)

ساعاتها 3 بالمعدل بس بالحقيقة 6 ساعات على ثلاث أيام ، ساعتين ساعتين ساعتين .

مادة سهلة راح يعلمك عن انواع الكمبيوترات و الوندوز 7 و كيف تستخدم الورد و الإكسل و البوربوينت و متصفح إنترنت إكسبلورر ، المادة طويلة شوي بس سهلة الحمد لله ، أول فصلين هم الي صعبين شوي لانهم كلام كلام بالانقلش ما فيه عملي ، بس أحسن شي أنك بتختبر فيه شهري بعدين خلاص ينحذف من النهائي 

طبعًا المنهج والاختبارات بالانقلش والمدرسات أغلبهم من الجنسيه الهندية ، متعب الموضوع بالبداية مع الاكسنت حقه بس فترة بسيطه و تتعودين و تبدأين تفهمين وش تقول الحرمة . الاختبار الشهري راح يتكون من جزئين الأول عملي و الثاني نظري, العملي تافه بيقول لك سوي ملف جديد او انقل ملف ، اما النظري اختيارات هنا لازم تحفظ (بالشهري راح تكون جزئيه النظري أكثر من العملي ، بس بالنهائي العكس ) بالنهائى يصير باقي لك بس تدرس وورد وبوربينت واكسل وانترنيت كلهم يشبهون بعض مرره ، فافضل شي ابدا ذاكر الوورد لانه أشمل شي وكلهم يشبهونه . وركززز بالمطلوب بالاختبار زززين !

بنص الترم بيطلبون منكم تسوون مشروع تصميم موقع ، مرره حلو وممتع وأهم شي أشتغلوا بضمير علشان تشوفون أنجازكم بعدين بفخر كبير () 

فيه للحاسب موقع خاص اسمه ايرا وهذا رابطة (http://era.py.ksu.edu.sa) مرره ممتاز فيه واجب عملي تيك تشالينج عليه 10 دراجات كنهم يعطونك هدية 10 درجات من سهله تافه مرره ، ينزل على دفعات سويه اول باول علشان ما يتراكم عليك وتتعبين ، وصح ما يشتغل الا على الويندز وعلى الاكسبلورر فقط 

ومن أيرا ايضًا تحملين برنامج حلو تطبيقين عليه قبل الاختبار ، يعيشك جو الاختبار بالضبط ممتاز 

مهارات الاتصال وأختصاراها (علم 140)

المادة ساعاتها 2 بالمعدل وبالصدق ثلاث ساعات .

يعلمون الطالبة فيها اهمية الاتصال ويكسبونه المهارات الاساسيه فيه وكيف يتواصل مع ذاته ويعزز فيها الثقه وكيف ينوع بين الاتصال اللفظي والغير لفظي وكيف يوظف لغة الجسد بطريقه تواصله مع الاخرين ويكسبونه اهم مهارات التحدث امام الجمهور واخيرًا كيف يميز بين مهارات القائد وسماته << تعبت وانا اتذكر 

بنص الترم يطلبون منك مشروع ، تختارين يا ( فلم وثائقي - فعالية - شي للمجتمع نسيت وش هو والله )

أنا كنت فلم وثائقي الشغل جميل عليه وممتع ، اخر شي تعرضينه قدام الاستاذه وباقي الشعبه وتتكلمين عنه بشكل بسيط 

المذاكره في هالمادة من الكتاب فقط والاختبارات والشرح بالعربي

:

اللغة الانجليزيه الاكاديمية (نجم 154)

ناخذها الترم الثاني وهي نفس الترم الاول من ناحية الساعات الفرق أنه هذي مافيها قرمر كثير الاغلب شي أكاديمي كيف أتكلم مع المدير كيف أكتب ايميل رسمي ايش المفروض ما اقول وانا اعرض مشروع قدام مجموعة مهمه وشي زي كذا اغلبها مهارات 

مهارات بالاستماع ، الكتابه ، القراءه والمحاثة . المذاكره من السلايدات الي يرسلونها لكم الجامعه فقط مو من الكتاب .

حساب التفاضل (ريض 150)

ساعاتها 3 وبالصدق اربع ساعات .

تتكلم عن النهايات و الإشتقاق , مادة يبيلها تركيز قووي اول بأول و زي الريض 140 الدكتورة بتعطيك خطة المنهج ذاكر منها و فيه وسائل مساعدة مثل شرح فيديو للدروس تلقاه في موقع السنة التحضيرية (البلاك بورد ) أ.نضال رهيب شرحة ، وتلقا بعض مقاطعه باليوتيوب لو ما فتح معك الموقع ، مشكله الماده ان كل الفصول تتشابه فيبي لك تركيز شوي علشان تفهم وش المطلوب بالضبط ، الرياضيات المنهج الوحيد الي اختباره تحريري يعني أنت محاسب على طريقه الحل .

وإلى هنا نكون خلصنا مواد الترم الثاني 

أي سؤال أو أستفسار هنا أو على تويتر أتشرف فيكم

@hanellz

أهم الروابط للانقلش

صبحهم بالخير يارب تكونون بأفضل صحة وأحسن حال.

هنا أهم الروابط والي فادتني شخصيًا وأتمنى يارب انها تفيدكم

لكن قبل كل شي مو لازم كلها تشتغلون عليها ، شوفي الموقع الي ارتحتي عليه واعتمديه علشان ما تتشتتين.

أول شي هذي السلايدات الي تذاكرون منها فقط للاختبار موب من الكتاب :

http://py.ksu.edu.sa/female/ar/node/1405

المادة المطلوبة للاختبار النهائى - اللغة الانجليزية - مقررات الفصل الدراسى الاول > غالبًا ما تتغير من سنة لسنه بس برضوا تأكدو 

http://py.ksu.edu.sa/female/ar/node/1497

المادة المطلوبة للاختبار النهائي - اللغة الانجليزية - مقررات الفصل الدراسى الثاني > بعد برضوا تأكدوا

^^ وللاسف ما لقيت روابط حقت الميدتيرم.

والأن بعطيكم أكثر المواقع الي فادتني كثير: 

https://epy.ksu.edu.sa/ELSDOnline/?page_id=2726

هذا أهم موقع جمممميل من الجامعة ، فيه اختبارات على كل مهاره ، وفيه شرح لبعض القواعد + بفترة الميد والفاينل ينزلون لك تدريب كامل على الاختبار بالكلمات المطلوبة والقواعد المحددة فقط ، والموقع مرتب ركزوا عليه.

https://enrolment.oxfordlearn.com

أول هذا موقع الجامعة للانقلش ، ادخل وسجل دخولك برقمك الجامع وكذا بعدين اختار كتابك ويعطيك اسئله على كل يونت بالضبط، أنا ادخله قبل الاختبار حلو. فيه كل المهارات المطلوبة >> مع أني ما حبيته مرره مدري وراه ()

http://spellcheckplus.com

هذا موقع يفيدك بالرايتنق ، تكتبين ويصحح لك سواء بالقرمر أو بالسبلنق. حلو تدربون عليه قبل اختبار الرايتنق.

http://writersdiet.com/?page_id=4

هذا بعد موقع يصحح لك الرايتنق حقك ، حلو بعد ما تخلصين مذاكره تختبرين نفسك هنا ، ممتاز.

http://www.engvid.com

هذا موقع يفيدك بالقرمر ، آذا عندك مشكله بأي قاعده هذا يشرحه لك وتقدرين تحددين الاستاذ الي ارتحتي لشرحه و اكتبي اسم القاعده الي تبينها ويطلع لك كل الاساتذه الي شرحوها.

http://www.talkenglish.com

هذا موقع حلو للسبيكنق او للسننق يعطيك أهم الجمل والنطق الصحيح لها ، ما تعمقت بالموقع كثير أعتقد ان فيه أشياء مميزه أكثر من كذا.

http://www.esl-lab.com/index.htm

هذا موقع للسننق حلو فيه مستويات جربيها كلها حبه حبه من اقل مستوى لين يصير سهل روحي للي بعده ، ممتاز وفيه نماذج كثيره مررره ، عجزت اخلصها.

http://www.myenglishpages.com

هذا موقع حلو يفيدك لكل مهارات الانقلش رهييييب رهيييييب بمعنى الكلمة ، يشرحلك كل القواعد بعدين يسوي لك اختبار عليها وتقدرين تختبرين نفسك بكل القواعد ، وفيه للسبيكنق وكل شي ، اتعب وانا اقول رهيب.

http://www.english-grammar-lessons.com

هذا موقع بعد يشرح لك كل قواعد اللغة > ما جربته للامانه ، بس فتحت عليه أتاكد أنه شغال.

http://fraze.it

وهذا محرك بحث رهييب اذا عندك كلمة وما تعرفين كيف تستخدمينها ، اكتبيها هنا وهو يطلع لك جمل كثيره عليها 

مواد الترم الاول تحضيري علمي، وكيف نذاكر كل وحده بالضبط؟

حيهّم شلونكم شخباركم؟ 

يارب تكونون بأفضل صحة وأحسن حال .

اليوم بكتب لكم مواد الترم الأول وكل وحده وش أفضل طريقة للمذاكره من وجهة نظري .

 اللغة الانجليزية وأختصارها ( نجم 142 )

ساعاتها 8 بالمعدل بس بالحقيقة تختلف من مستوى لمستوى زي ما قلنا سابقًا .

لغة انجليزية عامة و هي عبارة عن 4  كتب, كتابين من اول الترم لين الميد, و كتابين من بعد الميد إلين الفاينل

مادة سهلة وحلوة وزي الثانوي مافي فرق مفيييييده مره لا تضيعونها , مدرسين نجم كلهم اجانب من كندا و امريكا و بريطانيا و نيزلندا, المدرسين وسيعين صدر ويحمسونك للدراسة ولا يفشلون أحد لا تستحي و سولف معهم قدر الإمكان لا تصير مزهرية علشان تتطور لغتك

المادة عليها 8 ساعات يعني حاولي تجيبين أ+ لأنها بترفع معدلك بشكل كبير ، حطوا كل تركيزكم عليها لانها أهم مادة 

بخصوص الاختبار راح يكون محوسب يعني على الكمبيوتر مو ورقي عليه 30 درجة ,الميد راح يكون من اول كتابين و راح تجي الأسئلة  10 قرامر و 10 فوكاب (كلمات) و 20 ريدنق و 20 ليسننق ، كل سؤال عليه نص درجة

بعدين يجي الفاينل و ينقسم إلى 3 إختبارات: الأول رايتنق تكتب قطعة ما تقل عن 80 كلمة (لفل B) طبعًا ما يعلمونك الموضوع قبل ، فحط ببالك مواضيع براسك لو بشكل عام ، واكتب مقدمة عامه تنفع لكل المواضيع اسهل لك . و الثاني اختبار محوسب زي نظام الميد ، وأخر شي الثالث اختبار سبيكنق و هنا راح يسألك بعض الأسئلة الشخصية مثل كيف تجي الجامعة و كم عدد افراد اسرتك, طبعا تجاوب عليه بالإنجليزي ، بعدين يعطيك كلمات مفرقه ويقول لك كون لي منها سوال واسال صديقك الي معك. 

المذاكره تكون من السلايدات وبرفقها بالتدوينه الخاصه بالروابط المفيده لمذاكره الانقلش أن شاء الله .

مقدمة بالرياضات وأختصاراها (ريض 140)

ساعاتها 2 بالممعدل وثلاث ساعات بالصدق .

مواضيعها المجاهيل و المتجهات و الدوال المثلثية و اللوقاريتمات ، وكلها مثل الثانوي بالضبط الافرق انها بالانقلش

 المادة سهلة مررره بس يبيلها تركيز و مذكرة اول بأول و ركزي مع الدكتوره وأحرصي على الحضور , و هي المادة الوحيدة

اللي لها اختبار تحريري موب خيارات ,الدكتوره راح تعطيك خطة المنهج و ذاكري اللي في الخطة بس و بإذن الله تضمن درجة حلوة ، الاختبار والمنهج بالانقلش بس الدكتورات عرب ويشرحون بالعربي . فيه بالبلاك بورد مقاطع شرح لكل الدروس رهيب شرحة واحد من الدكاتره ، يسهل المعلومه بشكل كبير ، حلو لو ما فهمت مع دكتورك رح لمه ممتاز 

مهارات التعلم و التفكير و البحث (نهج 140)

ساعتها 3 وبالصدق اربع ساعات .

 مادة سهلة ومتتعه جدًا خصوصًا لو جتك أستاذه رهيبه بتحبين المادة أكثر الماده فيها مشروع بحث نصيحة سوو المشروع بضمير علشان تتقنون كيف تسونه ، لانه بيفيدكم بالمستقبل سواء بالجامعه أو بالمستقبل البعيد . وأغلب الاستاذات بيخلونكم تسوونه بداية الترم قبل ما تبدا الاختبارات . الماده المنهج والاختبارات كلها بالعربي ، والاختبار اختيار من متعدد ورقي زي القدرات .

الصحة واللياقه (صحة 150)

ساعتها 2 وبالصدق 2 >> أخيرًا ماده صادقة. تاخذونها مره بالاسبوع ساعتين وبس .

مادة حلوه وخصوصًا للي حاب يتعلم عن الرياضه اكثر ومررره مفيده كيف تسوي لك جدول رياضي كيف تنظم اكلك وش المفروض تاكل بالضبط واخر فصل هو الي شوي عن الاسعافات الاولية واغلب اسئله الفينال عنه ، أنصحكم كيف تذاكرون الفصل الاخير وخصوصًا انه تتشابه ، في بموقع السنه التحضيريه (البلاك بورد) فيه فيديوات عن الحاله وكيف تعالجها فتثبت بمخك أكثر وسوو مثلي أمسكوا لكم دميه اذا ما عندك أخو صغير وابدا طبق عليه >< ، بتثبت بمخك أكثر ، المنهج والاختبارات بالعربي والاختبار زي كل مواد العربي اختيار من متعدد ورقي زي القدرات .

بالصحة لها مشروع تختارين من هذولي ( دورة إسعافات اولية ، 10000 خطوة ، بحث زي النهج )

لها معايرها وراح تعلمكم عنها الاستاذه. وفيه أيضًا ملزمه تحلونها هي الي فيها تسوون لكم جدول رياضي كامل وهذا حلو تقدرون تسالون اي مدري رياضي يساعدكم أو تعالوا لي بتويتر أساعدكم ، دامني أعرف للجداول الرياضيه هههههههه .

السنة التحضيرية من بعيد شوي.

حيهّم

السنة التحضيرية … وش اقول وش أخلي من احلى السنوات الدراسية خصوصًا انها تعرفك على ناس كثير وتوسع علاقاتك أكثر وتتعرف على ناس من جميع الاطياف والطبقات والمجتمعات كلها .

اول ما تدخلين الجامعة راح تكونين مع شعبة بحدود 22-27 راح تكونون مع بعض بكل المواد في نفس الترم 

طبعًا غير عن المدرسة ، الجامعة لكل دكتورة قاعة أنتِ تروحين الله لا يهينك لها أذا جاء وقت المحاضرة هي ما تجيك

ممكن اكثر شي كان متعب للطالبات اللي هو طول فترة الدوام ويختلف الدوام باختلاف الايام مو كل يوم زي بعض

في  يوم الى 12 الظهر ويوم الى 3 ويوم الى 10 يختلف من جدول طالب لطالب .

راح تكون سنة سهلة بإذن الله لذلك استغيلها لمصلحتك و أحرصي تجيبين معدل عالي ، كثير من الطالبات إهملوا السنة التحضيرية فتتفاجأ بمعدلات نازلة وهذا أكبر غلط ، لانك بتتحملين هالغلط طول مسيرتك الدراسية ، فأنتبهوا زين !

وأهم معلومة تذكري أنك يوم دخلتي الجامعة العداد يتصفر تلقائيًا محد يعرف مين أنتِ قبل ! شاطره والا مو شاطره 

مهمله أو لا ، محد يدري ! > وأيضًا على الصعيد الاخر محد يدري أنك شاطره وأن درجك بالقدرات كذا والتحصيلي كذا أساسًا ما يهمهم ! الموضوع يبدا من جديد وزيك زي أي شخص أنقبل () فشدو حيلكم بالتحضيري وأضمنوا معدل عالي.

* إلا في بعض التخصصات ينظرون الى نسبتك المركبه مع المعدل مثل الكليات الصحية والهندسية أعتقد .

مباني السنة التحضيرية:

السنة التحضيرية لها مبنين الأول المبنى العلمي والصحي مع بعض و الثاني الإنساني وتقدرين تتنقلين بينهم

المبنى العلمي يدرسون فيه طلاب المسار الصحي و العلمي ، البنات للحين الدراسة بعليشه والشباب بالدرعية 

عليشه والله حلوه مو زي ما هم يقوولون عنها والله خضار يوسع الصدر وشرررحة مره تفتح النفس للمذاكره 

باليوم التعريفي في كان كورنرات تعرف عن النوادي الي بالتحضيرية ><

جميلة جدًا وحلو لو كانت لك مشاركة في واحد منهم يفيدك بسيرتك الذاتيه وبسجلك المهاري بعدين 

من النوادي الموجوده ( نادي الصحة واللياقه - نادي المجلس الاستشاري - نادي رياده الاعمال - نادي المجتمع - نادي سفيرات التحضيرية > وهذا انا كنت عضوه معهم ) لا تفوتونهم جميل جدًا ، الشغل معهم ممتع ويودونكم رحلات ويخلونكم تقابلون ناس كويسه ويسون لكم دورات تدريبية.

من استلام وثيقة الثانوي إلى استلام البطاقة الجامعية

بسم الله الرحمن الرحيم ، صبحهم بالخير يا رب تكونون بأفضل صحة وأحسن حال .

ولاني مريت بهذي المرحلة وكنت أبي أحد بس يعلمني وش أسوي ، قلت أفيد لو بالشي القليل ()

نبدأ بأول شي من بعد ما نستلم وثيقتنا الثانوية وش نسوي ؟

نقدم على الجامعة الكتروني من هنا [ بوابة القبول الإلكتروني الموحد للطلاب] وهنا [ بوابة القبول الالكتروني الموحد للطالبات ]

طريقة التقديم بسيطة جدًا بمجرد دخولك الموقع اضغطي على تقديم طلب جديد بعدين تبدين ترتبين المسارات و الجامعات اللي انتِ تبيها

رتبي على حسب رغبتك كل الجامعات بالرياض لأن لا قدر الله اذا ما انقبلتي بالجامعة اللي تبينها تكونين حاطه جامعة ثانية بدالها.

بعدين تستنين من يومين إلى ثلاث ايام الين ما يطلع قبولك إن شاء الله (ويارب تنقبلون كلكم بالجامعة الي تبونها)

بعدين طالبات المسار الصحي يحددون لهم يوم مقابلة وتكون بالدرعية مو عليشة ، العلمي والانساني ما لهم مقابلات

بعدين ترسلون ملفاتكم عبر البريد علشان يتأكد قبولك ويحددون يوم معين لاخر يوم بالارسال ، لازم قبله. ( والسنوات الي بعدها ما احتاجوا لكذا، فتاكدو)

بعد القبول راح يطلبون منك تحددين موعد لليوم التعريفي والي يكون غالبًا قبل الدراسة بأسبوع أختاري اليوم المناسب لك.

و راح يكون فيه تعريف بأهم القوانين بالجامعة + إصدار بطاقاتك الجامعية + بطاقة الصراف للمكافآت + وأخيرًا إختبار تحديد مستوى لغة انجليزية

نقطة مهمه رجاءً رجاءً لوسمحتي , وتتكرر كل سنه ، حلي اللي تعرفينه فقققط! , الاختبار ما عليه درجات ابد , لحد يلعب عليك و يقول لك لا تحلين شي علشان تدخلين لفل A اسهل أو علشان تأسسين صح ووو.. صدقيني محد خسران الا انتِ .

و بعد اختبار تحديد المستوى تنقسم الطالبات إلى ثلاث مستويات:

A اللي لغتهم ضعيفه شوي فيبدون من أول شي الاحرف والارقام وكذا + ياخذون الإنجليزي يوميا 4 ساعات يفصل بينها بريك ربع ساعة

B لغتهم الانقليزية متوسطة بس يبيلهم تدريب أكثر في القرامر و الفوكاب, و مدة المحاضرة اليومية 3 ساعات يفصل بينها بريك ساعة الاربع

C للي لغتهم الانقليزية قوية و مدة محاضرتهم في الترم الاول ساعتين بدون بريك , و في الترم الثالث 3 ساعات يفصل بينها بريك ساعة الاربع وأهم نقطه عندهم يوم أوف بالاسبوع الترم الاول فقط .

^^^ 

كل المستويات متساوية في الاختبارات موحده الاسئلة + عدد الساعات بالمعدل ، فقط يختلف طريقه التدريس وعدد الساعات.

طبعا كل طالب يطلع مع اليوم التعريفي له رقم جامعي خاص يبدأ بسنه قبوله مثلًا احنا كنت 436000000 

ويختلف من الشباب للبنات من الارقام الي بعد السنه يعني :

(البنات 43620XXXX كل البنات نفس البداية )

(الشباب 43610XXXX كل الشباب نفس البداية)

مستوى ثالث ، ادا ١٠١

مبادئ ادارة 

بسم الله الرحمن الرحيم،  كيف حالكم عساكم طيبين؟

بالنسبة لمادة الاداره فهي مادة حفظ حفظ حفظ مع فهم بسيط علشان تقدر تحفظ 

انا درست عند أ.حنان المتحمي كويسة وحقانية بالدرجه يعني الي يدور وحده تدف ما يجي عندها (لان كثير يسالون)

الماده لها اختبارين شهري ٢٥ كل واحد وفاينل ٤٠ وفيه ١٠ درجات بيد الاستاذه،

 فبعضهم تحطها كويز وبعضهم مشروع وبعضهم الاثنين .

وبما أن المنهج طويل شوي ففيه ملخصات لبنات ملخصين المقارنات لحال والتعداد لحال وكذا 

جدًا سهل علي بالفاينل الله يجزاهم خير ، فبحطه لكم .

http://www.4shared.com/folder/UfAn86Yl/__online.html

^^

الرابط يحتوي على ملفات عديدة منها مقارنات ، تعداد وايضًا من أهم الملفات ملف تجميع التعريفات للفصول الي كانت داخله منها بالفاينل

( ٥،٧،٨،٩،١٠،١١،١٣،١٥،١٧)

*************

نصيحة نصيحة 

بهذي المادة التست بانك مهم مهم مهم جدًا يجيبون منه نصًا بالاختبارات 

مستوى ثالث ، حسب ٢٠١

مبادئ المحاسبة ، حسب ٢٠١

أهلًا  وسهلًا ، كيف حالكم عساكم طيبين؟ 

نبدأ بالمحاسبة بسم الله، حنا كنا اول دفعة تدرس الكتاب الجديد وصراحة بما أن عندي نسخة من القديم

فالجديد افضل ويفتح النفس أكثر، الاول كان كئيب بس كان فيه ميزه ان الامثله على شركات سعودية

بينما الجديد لانه مترجم فالشركات كلها مو عربية

عمومًا المادة ممتعه جدًا جدًا الى بكرا وانا اقول ممتعه، تعتبر فهم مرره فاذا غبتي ماراح تفهمين ولهذا اغلب الاستاذات ما يركزون على الحضور لان الطالبة الخسرانه


 اغلب استاذات المقرر رائعات أنا درست عن أ.نهى القعود مدري وش اقول عنها والله ، استاذه رائعة ومخلصه بكل ما تحمله الكلمه من معنى

فيه بعد استاذات سمعتهم كويسة مثل ، منال العجروش ، ريم الصلاحي، هنا المغامس وغيرهم أكيد


طيب ولان الكتاب تمارينه كثيره مره وفيه خطة انرسلت من قسم الرجال لمجموعة اسئله محدده بكل فصل

 ومافي استاذه حلتها كلها الا استاذه وحده وهي استاذه نهى الله يجزاها الجنة ،

كانت تحلها معنا وتكتبها بملف وترسله على ايميلتنا للبنات الي ما خلصوا الكتابه بالمحاضره


فبنزلها لكم هنا كلها باذن الله (كل الفصول موجوده الا الفصل الثالث) 


http://www.4shared.com/folder/mtFfG5W0/___online.html


^ حملت كل الفصول على هذا الرابط. وأتمنى الحقوق تبقى لاستاذه نهى()


أيضًا بالرابط حملت تجميع تعاريف المحاسبة للخمس الفصول الاولى، من تجميع زميلة اسمها مشاعل *$




+ نصيحة فيه ملخصات أستاذة نورة الماضي كانت موجوده بخدمات الطالب حقت الكلية ،

 رائعة رائعة جدًا ملخصه الكتاب بشكل مررررتب مره ، فاذا غبتي بيوم اقري ملخصها بتفهمين باذن الله < ما قدرت احطه لكم لانه متشعب وما قدرت اضيفه بس تلقونه بالتصوير يا بنات


بالنسبه للتجميعات بحر بحر وانصحكم تدربون عليها مع ان امثله الكتاب شامله جدًا ،

بس ركزو على أن المنهج اختلف فبعض بعض المسميات اختلفت وبعض الاشياء انحذفت من عندهم وكذا

 فلا تتوترون اذا شفتوا سوال ما عرفتوا تجاوبون عليه بالتجميعات

https://app.box.com/s/oqx96bt53ajln31wwf81oeeaw1fv7cgl  

^^ هذا رابط فيه تجميعات سابقه كانت نازله مكتبه الكلية.


http://fac.ksu.edu.sa/lalbunyan/course-material/58775 

^^ تجميعات أيضًا من موقع أ.لمياء




وهذي صور لاختباراتنا الترم الاول سنه ١٤٣٦..

وانصحكم تتدربون عليها لان هي أجدد شيء وعلى طريقة الكتاب الجديد *

( الصور مو من تصويري ولا حلي، بس هذا الي لقيته لكم )